Ганна
Баборык
Баборык Ганна Уладзіміраўна нарадзілася 7 жніўня 1959 года ў вёсцы Моцевічы Жалудоцкага раёна Гродзенскай вобласці. Скончыла Мінскі інстытут культуры (1980). Працавала ў сферы культуры горада Ліды. Ганна Уладзіміраўна з’яўлялася салісткай народнага ансамбля народнай музыкі “Гудскі гармонік” філіяла “Гудскі цэнтр творчасці і вольнага часу”. Аўтар тэкстаў многіх песень, якія выконваюцца ансамблем, створаных у творчым саюзе з кіраўніком калектыву Колышка А.А., іншымі самадзейнымі кампазітарамі. Аўтар урачыстай песні пра Ліду.
Да вашай увагі некалькі вершаў Ганны Баборык.
Песня-гімн “Слаўся, Ліда!”
(музыка – Вячаслаў Пыпець,
словы – Ганна Баборык)
Дзяўчынай юнай з сінімі вачамі,
Нягледзячы на сталы твой узрост,
Глядзіш на свет царыцай велічавай,
Мой родны горад, ў зелені бяроз.
Прыпеў:
Ліда, цябе праславіў твой народ!
Ліда, ты прыгажэеш з году ў год!
Ліда, табе я сэрца аддаю!
Славу свайму я гораду пяю!
Ты з гонарам нясеш сваю паставу
Ад Гедыміна і да нашых дзён
І Магдэбурскага дастойна права -
Табе адной сардэчны мой паклон.
Прыпеў:
Ліда, цябе праславіў твой народ!
Ліда, ты прыгажэеш з году ў год!
Ліда, табе я сэрца аддаю!
Славу свайму я гораду пяю!
Мая Радзіма, горад мой адзіны,
Хачу каб ты квітнеў і працвітаў.
Для многіх ты народаў стаў Айчынай,
Мой родны непаўторны Лідскі край.
Прыпеў:
Ліда, цябе праславіў твой народ!
Ліда, ты прыгажэеш з году ў год!
Ліда, табе я сэрца аддаю!
Славу свайму я гораду пяю!
З гадамі набываеш болей сілы
І расцвітаеш кожны год ярчэй,
І голас Ліды ў роднай Беларусі
Штогод усё мацней і ўсё званчэй!
УСПАМІН АБ РАДЗІМЕ
Колькі ўжо раз, ад’язджаючы з дому,
Я ўспамінала радзімы куток:
Бераг, дзе ўдзень спачывала ад стомы,
Стройны, над самым абрывам дубок.
Я ўспамінала жытнёвае поле,
Мілыя сэрцу майму васількі,
Неба радзімы, што душу спатоліць,
Песню, што гуртам падхопяць жанкі.
Мусіць, няма ва ўсім белым свеце
Гэткай прываблівай свежай красы.
Толькі ў нас, можна лёгка прыкмеціць,
Колеру жыта ў дзяўчат валасы.
***
Каля рэчкі, каля гаю
Свайго любага чакаю.
Ты прыйдзі хутчэй, каханы,
Мой салодкі, мой чаканы.
Залюблю, і зацалую,
Ды вачыма зачарую,
І спляту з расін вяночак,
Каб прыгожы быў мой хлопчык.
За ракой пяе зязюля.
Чую, кліча ўжо матуля.
Асноўныя творы
-
Баборык, Г. Вершы / Ганна Баборык // Ад лідскіх муроў : літар.-маст. зборнік 2012-2015гг. / гал. рэд. Станіслаў Суднік ; уклад. Станіслаў Суднік, Алесь Хітрун. – Ліда, 2015. – № 8. – С. 44-49.
-
Баборык, Г. Слаўся Ліда! Мой горад – Ліда : песні / Ганна Баборык // Мой любы горад Ліда: зборнік вершаў / склад. Т. І. Зенюкевіч, рэд. І. Г. Белуш. – Ліда, 2008. – С. 44-45.
Аб жыцці і творчай дзейнасці
-
Баборык Ганна Уладзіміраўна // Ад лідскіх муроў : літар.-маст. зборнік 2012-2015 гг. / гал. рэд. Станіслаў Суднік ; уклад. Станіслаў Суднік, Алесь Хітрун. – Ліда, 2015. – № 8. – С.44.