Пётр
Макарэвіч
Пётр Рыгоравіч Макарэвіч (15.04 1938 г. – 12.12.2014 г. Ліда) нарадзіўся ў вёсцы Шынкі Крупскага раёна Мінскай вобласці ў шматдзетнай сям’і. Дзіця вайны – яму ішоў чацвёрты гадок, як пачалася Вялікая Айчынная вайна. Скончыў педагагічны інстытут імя М. Горкага (бібліятэчны факультэт). З 1964 года жыў у Лідзе, працаваў у розных установах горада. Каля трыццаці гадоў аддаў працы карэспандэнта на Лідскім радыё і ў рэдакцыі мясцовай газеты “Уперад”.
Член Саюза беларускіх пісьменнікаў (2008 г.). Пётр Макарэвіч займаўся перакладамі з беларускай мовы на рускую і наадварот, а таксама з польскай мовы на беларускую. Ён выдаў кнігі паэзіі “Злітак”, “Расінкі беларускіх слоў”, а таксама перакладаў кнігу “Птица свободы”. Пётр Рыгоравіч пісаў вершы, напоўненыя багатым зместам, глыбокімі думкамі. Эмацыянальна цёплыя, па-мастацку выразныя, яны заўсёды прываблівалі да сябе чытача, духоўна ўзбагачалі яго.
Да вашай увагі верш Пятра Макарэвіча.
РАНАК НА БАЦЬКАЎШЧЫНЕ
Па маладзенькіх промнях дня
У неба пот віецца парай.
Святлеюць сосны за папарам,
Дзе блізкая мая радня
Ля прадзедаў зямельку парыць.
А я, як Ясір Арафат,
Спавіўшы галаву хусцінай,
Кашу атаву канюшыны
Паблізу дзедаўскіх прысад
У звоне хмары камарынай.
Да вуснаў туліцца ручай
(у маленстве – Дзедава Крыніца),
Што з-пад алешніку бруіцца,
І аціхае мой адчай
З глытком гаючае жывіцы.
Пракосы ў кропельках расы
Тымцяць вясёлкаю на сонцы
І пах мядовы льюць бясконца…
Пасля пластую, блудны сын,
Ласунак матчынай кароўцы.
Упершыню падперазаў
Без бацькі сена воз духмяны.
І адпускаюць сэрца раны.
І з возам коціцца сляза
Любові, удзячнасці, прызнання…
Асноўныя творы
-
Макаревич, П. Птица свободы: антология одного стихотворения / Пётр Макаревич. – Минск : Кнігазбор, 2012. – 120 с.
-
Макарэвіч, П. Расінкі беларускіх слоў: вершы, пераклады / Пётр Макарэвіч. – Мінск, 2008. – 172 с.
-
Макарэвіч, П. Злітак: лірыка / Пётр Макарэвіч. – Ліда: Лідск. друк., 1997. – 72 с.
Аб жыцці і творчай дзейнасці
-
Васько, У. Сто галасоў аднаго зборніка : [тры дзесяцігоддзі лідскі паэт Пётр Макарэвіч захапляецца перакладамі на беларускую мову твораў класікаў і знакамітых сучасных паэтаў Расіі] / Уладзімір Васько // Літаратура і мастацтва. – 2012. – 15 чэрвеня. – С. 7.
-
Анталогія аднаго верша ад Пятра Макарэвіча : [зб. П.Макарэвіча “Птица свободы”] // Наша слова. – 2012. – 16 мая (№20). – С. 8.
-
Васько, В. Удача автора книги “Птица свободы” : [о новой книге лидского поэта Петра Макаревича] / Владимир Васько // Принеманские вести. – 2012. – 3 мая.
-
Газета – мая сваха: [газета “ЛіМ” у жыцці паэта Лідчыны Пятра Макарэвіча] / Пётр Макарэвіч // Літаратура і мастацтва. – 2012. – 24 лютага (№8). – С. 5.
-
Лідзін, П. Лідчане прыняты ў Саюз пісьменнікаў: [Уладзімір Васько, Алесь Стадуб, Пётр Макарэвіч] / П. Лідзін // Принеманские вести. – 2008. – 3 января. – С. 7.
-
Жалкоўскі, А. ...і вершам з бярозавым сокам: [лідскі паэт П. Макарэвіч] / А. Жалкоўскі // Принеманские вести. – 2008. – 17 апреля. – С. 5.
-
Салавей любові і кахання : [Адам Міцкевіч ў жыцці лідскага паэта П.Макарэвіча] / Пётр Макарэвіч // Лідская газета. – 1998. – 24 снежня.
-
Тэленарыс пра паэта : [Пятра Макарэвіча] // Тэлескоп. – 1998. – 27 жніўня.
-
Шафарэвіч, Т. Прэзентацыя зборніка : [“Злітак” П. Макарэвіча] / Т.Шафарэвіч // Тэлескоп. – 1998. – 14 мая.
-
Вершы, народжаныя любоўю: [зборнік “Злітак” П. Макарэвіча] // Лідская газета. – 1998. –31 студзеня.